АИ-92 шатахууны үнэ өнөөдрөөс литр тутамдаа 50 орчим төгрөгөөр буурч байгаа талаар АМГТГ(Ашигт малтмал, газрын тосны газар)-аас мэдээллээ.
Энэ талаар Ашигт малтмал газрын тосны газрын Газрын тос хариуцсан орлогч дарга Ц.Эрдэнэбаяр “Даваа гарагаас эхлээд хямдарсан үнэтэй шатахуунууд орж ирж эхэлсэн. Дэлхийн зах зээл дээр газрын тосны үнэ буурснаар АИ-92 шатахууны үнэ тонн тутамдаа 58 ам.доллараар хямдарч орж ирж байна. Ингэснээр шатахууны үнэ литр тутамдаа 120-130 төгрөгөөр буурах нөхцөл бүрдсэн ч ханшийн нөлөөгөөр 70-80 төгрөг нь хасагдахаар байгаа. Иймд 50 орчим төгрөгөөр буурах болж байна” гэлээ. Дизель түлшний тухайд онцгой албан татвартай тул одоогоор үнэд өөрчлөлт орохгүй аж.
Өнөөдөртөө багтаад бүх ШТС-ууд үнээ буулгана гэдгийг тэрбээр нэмж хэллээ. Ингэснээр АИ-92 шатахууны үнэ 1,800-аас бууж орж ирэх нь.
Дэлхийн зах зээл дээрх газрын тосны үнэ одоо ч буурсаар байгаа. Тиймээс дөрөвдүгээр сард шатахуун улам хямдарч орж ирэх хүлээлттэй байна. “Дэлхийн зах зээлийн ханшийг дагаж Монголд шатахууны үнэ буурна. Гэвч ханшийн нөлөөллийг бид зохицуулах боломжгүй. Яагаад гэвэл ААН-үүд “Роснефть”-ээс шатахуунаа импортлохдоо ам.доллароор тооцоо хийдэг” хэмээн Ц.Эрдэнэбаяр нэмж тайлбарлав.
0 cэтгэгдэлтэй